Pablo Pundik é actor, director e mestre de teatro especializado en improvisación. Integrante da compañía Impromadrid Teatro e é membro fundador da Liga de Improvisación Madrileña. É director do Taller de Teatro Asura e xogador nos equipos de Match de Improvisación da Liga de Improvisación Madrileña.
Improvisar é escribir no aire co corpo, coa voz, co meu imaxinario. É facer teatro, unha ficción artística, co atractivo de que o público percibe que todo está sendo creado diante dos seus ollos nese instante, en exclusiva para el.
Neste curso tentaremos aprender, dunha forma práctica, as técnicas e ferramentas básicas da improvisación teatral, crear escénicas únicas e irrepetíbeis, achegarse ás estruturas dos espectáculos de improvisación. Para acadar estes obxectivos traballarase a escoita, o adestramento e o desenvolvemento da espontaneidade, pretenderase dar e recibir propostas, preparar os motores (puntos de partida para iniciar unha improvisación), o desenvolvemento dunha improvisación (tomas de decisión) e o funcionamento dos espectáculos. |
